過關,過關,再過關...

先o個排咪話阿女夜晚終於肯瞓覺既,點知好景不常



個幾禮拜前佢又開始患上日間渴睡症同夜間厭睡症



真係…錯x晒



而家晚晚起碼扭到兩,三點,甚至三,四點先肯瞓,但係朝早7,8點就起身,我就冇乜所謂呀,因為我o個個時間都要返工啦,係難為左我老婆ja…



點知高處都未算高



呢幾日仲患埋<厭奶症>



真係蕭都比佢吹孿…



喂…..你唔食奶仲可以食咩呀???你唔肚餓既咩???



一隊個奶咀埋去就擰頭擰計,條脷就喪頂,對手仔就狂推,跟手就大叫



次次食得o個十m,你唔係咁細個就識減肥呀,師傅???



湊呢個女真係好似打機咁,過完一關又一關…



仲要關關都要打大佬,難打到死…



可欣呀…你老豆我都一把年紀架啦,唔捱得咁多架啦,比條好路黎行下啦,唔該…

突破

阿女由10月頭開始”喜愛夜浦”,攪到我兩公婆冇覺好瞓,



日日返工都好似拍緊”生化危機”咁



點解一個BB會喜愛夜浦呢?你永遠都唔會知,



點解一個BB晚晚都扭計扭到你吐血,你永遠都唔會得到答案



咁我就唯有作出一切既假設,用盡一切既方法



可惜都係完全冇用,佢繼續夜夜笙歌



咁有一次就同公司個阿姐講開,佢就問左我一個問題…



阿姐:BB返屋企既時候有冇買隻雞拜下神呀???



我:冇喎,雖然我屋企有神位,但係我除左日日裝香之外,我乜都唔識攪架喎…



阿姐:車…你都冇介紹佢比d祖先識,咁你d祖先都唔識佢,點會保佑佢je…



我:er……..(完全呆左)<又好似有d道理咁喎>



當時我都不以為意,聽完就算啦….



有一日,我o係屋企抱緊佢既時候,突然諗番起呢段對話



心諗,係喎,同祖先打個招呼都好喎,又冇壞既,一試無妨丫…



於是我就抱住阿女埋去神位,捉住佢對手仔o係度”請請”,跟住對住神位講<<呢個係我個女呀,……………etc>>

(拿…其實我並唔係一個迷信既人,只不過由細到大,屋企都有神位,每日裝香已經成為左習慣)



……………………………………………………………….

……………………………………………………………….



神奇既事發生啦,當晚阿女12點幾就瞓左,一直瞓到…………………

2點半…



冇錯,係2點半,2點半喊醒我一d唔覺得出奇,於是一如往常咁兜個奶咀質落佢個口度…



平時呢個動作只能夠令佢平靜一段短時間,等我可以去一去廁所,跟手就會大叫架啦



咁我梗係如常咁去屙尿啦,當我o係廁所出黎既時候,……



發覺佢,竟然瞓番喎…



歷史性既第一次極速瞓番呀…………..



咁我就梗係唔理咁多,扑到返上床瞓啦



但係唔好開心住,o係4點半佢又醒…..



之但係…….又極速瞓番



咁我就梗係又極速瞓番啦…^^

………………………………………………….

…………………………………………………

…………………………………………………

之後我就每日都同佢請請祖先,第二晚既情況一樣



第三日只係醒一次,



第四日開始就一覺瞓天光啦…(實在太…………感動啦)



我好耐冇試過一覺瞓天光啦………………………….



希望呢個情況可以繼續持續落去啦….




(真係唔知係巧合定咩啦,有時有d野就係咁神奇架啦)

一日一日長大

不經不覺可欣已經3個幾月啦



呢3個月真係人生既一大衝擊



我本來係一個坐唔定,成日都要搵野玩既人,



但係由老婆有左阿女開始,我就已經慢慢咁轉變



直至佢搶閘出世之後,改變就更加翻天覆地



每日除左返工就係湊女,換片,餵奶,暗瞓覺呢幾個動作不斷交替,仲有攪佢d濕碎野,忙到嘔血咁濟...



雖則十分枯燥與沉悶,但每當見到個衰妹,不論哭與笑,就自然lum晒,乜都自動自覺去做



湊呢個7星妹真係一d都唔容易,



頭個幾月住o係醫院,日日去睇佢之餘,仲多左一份掛心與擔心



擔心佢唔知會唔會有d咩事,晚晚瞓覺都好驚會電話響,驚係醫院打黎…



到後來返左屋企,,照顧都要特別小心,總之湊呢條友仔真係用左唔少心血…

一個月

2個月

3個月

100日

鬼叫你係我既寶貝咩~~~

我是一隻小小蟻

眨下眼,阿女就出左世兩個幾月啦

因為佢唔足月既關係,所以醫院幫我養左佢個幾月,不過呢個幾月都過得並不輕鬆,因為我同老婆日日都會去醫院睇佢,我就放左工去,老婆就早D去幫佢換下片,餵下奶,睇住佢由皮包骨到面豬DONE同D手仔腳仔多番D肉,真係有D感觸,生命就係咁奇妙...

經過左個幾月既頻撲日子,阿女終於夠體重出院,心情真係開心得黎又有D擔心...

擔心既係佢既體質始終同足月BB有個距離,O係醫院都仲有好多護士睇住,又有儀器CHECK住佢D心跳同血含氧量,但係一返到屋企就要靠自己觀眾,所以點都有D壓力

本來O係屋企住一個禮拜就會去外母度,不過因為佢屋企隻狗冇人肯要,所以費事D狗毛影響到水皮既阿女,老婆又仲放緊假,咁就比阿女繼續O係屋企...

初初出院既阿女好乖,唔會喊,又唔會扭計,真係非常好揍

但係...........................................................................

到左佢原定既預產期O個日,性情就作出左180度既轉變...

之前既佢唔扭計,唔喊,只係因為佢太細個,未識扭計,未識喊,但係而家........

佢同好多正常既BB一樣,日頭瞓到隻豬咁,點拍點叫都唔醒,但係一到11點後就鬼打都冇咁精神不停扭抱

有時仲抱都唔得,仲要UN住抱,有時仲要唱埋歌佢聽同不停O係佢耳仔邊講野,直至佢瞓著為止...

諗住瞓著左放番落床啦,HEY.....咪旨意,一擺低唔夠5分鐘佢又喊,真係人都癲....

而家都仲話老婆放緊假,可以全力咁揍佢,到遲D老婆返番工,咁就大X鑊啦...

阿女出左世之後,整個生活都完全咁扭轉晒,平時既活動完全停晒

鏢冇掟,酒冇飲,山冇行,相冇影,街冇出,一日到黑都係揍女,每日放左工返屋企都係做家務,煮飯,洗碗,洗衫,洗奶樽,吸塵,拖地

我發覺我已經成為一隻工蟻

不過只要阿女健康成長,開開心心,一切都係值得既...

囡囡搶閘記 2

入到產房,老婆都未係好大反應,咁就吹下水,攪下GAG啦...

隨住時間既流走,佢開始越黎越痛啦,面容開始扭曲

我其實真係冇乜可以做到,只有搵下野講,轉移下佢既注意力(其實都冇乜用)

整整下佢對腳開始出現抽筋既情況,咁我就開始忙啦

不停同佢鬆下D肌肉,佢又抽得騎呢喎,抽既位置不停移動

一時又小腿,一時又大脾,一時又腳指....ETC

總之我隻手就不停移動,冧晒檔...

去到3點幾,佢既表情越黎越痛苦,房入面既醫護人員亦越黎越多...

我心諗""差唔多係時候啦...""

O係呢個時候,有個姑娘穿上一身彷似""防幅射裝備""

又面罩,又手套...ETC

開始O係我老婆既下體位置攪攪貢,老婆亦開始鬼殺咁嘈啦...

突然佢開始大叫,我貢個頭去裝下...

WA....見到個頭仔啦.................

WAWA.........個頭仔出左黎啦.......

WAWAWA.......姑娘扯住BB個頭係咁擰係咁掹(喂....你睇住我個女呀.....)

攪左一陣,BB 雪一聲就出左黎啦...

條友仔一出到黎就瓜瓜叫,掙手掙腳...(噢......好得意呀,好感動呀......)

再望下老婆,如釋重負一般,鬆晒.....O個一刻真係有少少想喊,不過立即提醒自己,我話晒都係一個鐵錚錚既硬漢,要頂住...

BB因為得30週就出世,所以一出世就比醫生攞左去做健康評估,然後就即刻送左去深切治療病房,所以連抱都冇得抱,真係可惜...

不過最緊要既都係,母女平安

囡囡搶閘記 1

今朝開開下工,老婆突然打黎話唔舒服要去QE,咁我就梗係讚好啦,去check下都好丫...

 

隔左半個鐘倒,佢再次打黎話...

 

老公...醫生話BB準備要出世啦..

 

下???????????出世????

 

唔係馬........三十週ja喎...仲有兩個半月喎...

 

當堂嚇到我靈魂離體...



唔理三七廿一即刻收工返屋企執野去醫院支援佢啦



一路搭車就一路擔心,好似比蟻咬咁,



家陣早產喎,仲要早咁多呀,有風險架喎….



不過都唔擔心得咁多啦,只能不斷同自己講,正面d…



一到醫院即刻去產房<士釘敗>



之前完全冇上過甚麼甚麼堂,由細個讀書開始我已經係<天才波>既支持者

總之就自由發揮啦....

4D

而家d電影郁d都話要3D,跟手又收貴你幾條野,2D版就得o個小貓
三,四間戲院有得做,真係豺狼當道呀...

點知家陣大肚婆照超聲波去到4D tim啦...

4D??????

F4,G4我就識je....

4D我真係唔曉點4D法,不過是鬼但啦,老婆叫我去咪去囉...

不過阿女就真係唔合作啦,全程雙手掩面,好似打泰拳對護手咁,一路咁護住個頭

阿大夫不停咁攞住支野隊下隊下佢,我又傻佬咁不停o係度對住個肚叫佢放低手,先叫做郁左少少,但就點都唔育放低隻手

真係吹脹....

呢張叫影得最多塊面架啦...

不過見住佢o係度郁下郁下又好似幾得意咁喎...

得意???就咁睇就梗係得意啦,出左世識喊o個陣就唔慌唔得意啦...

再次執機

我已經好耐冇放假去郊遊影相啦...

所以尋日就專登約左崔氏伉儷,馮氏伉儷去左清水灣影影相

好好彩,天公造美,陽光普照..

搵個亭放低d野先

不過都真係幾熱...

我就都係不停咁偷影人啦...

睇下馮氏伉儷幾咁sweet

崖太胸襲親夫

馮太真係好鬼少女架...

呢張好似d唱片封面咁樣..

崔生突然狂性大發...

我始終都係鐘意影人...

久休後影番相感覺真係舒服,不過我發覺到一樣野

除左我個人老左之外,我覺得部相機同d鏡頭都老左...

成set野都好似有d力不從心咁,成像同顏色都好似差左...

其實係d器材老左丫??定係我既要求高左呢???

舊患到訪...

老啦....老啦.....

我條大陣又整親啦...

同以往有少少唔同,今次突然間好似比電電左一下咁

跟住就成個人梗左啦,郁一郁都痛

心諗....唉....呢次又要入大埔搵福建幫啦..

點知阿黃生突然有好介紹,話佢一家都係睇呢個跌打師傅既,

wa...講到家庭醫生咁,仲有最緊要就係近丫嗎,佐敦ja...

福建幫o個度係好,但係真係太....遠啦,次次去親來回都要兩個鐘,好倦架....

同埋只可以星期六收工先去到..若平日收工去,連車程,排隊,冇11點都返唔到屋企...

試問一個禮拜先睇得一次,點好呢???

所以就係"佐敦"呢兩個字吸左我去啦...

到而家睇左兩次,進展都叫幾好,因為腰真係好難好,我對上幾次都要成個月先好得返

希望今次呢個師傅可以令我快d好啦...

下集

老公……………

足足有分幾鐘未有第2句,wa…呢分幾兩分鐘o係o個陣就真係長囉…

呢段dead air我好似真係冇抖到氣,一直等佢出第2句(事後先發覺原來係咁緊張既)

當我開始覺得就黎窒息既時候,黎啦,黎啦…..有下文啦…

BB冇事呀……

首先我抖左一啖大氣,………………………………

跟手就不自禁地大大力脫口講左一個音

吊……………….

點解我會爆粗呢???大佬呀……

<<BB冇事呀>>呢幾隻咁簡單既字,5秒就可以打到出黎啦

乜解究要成分幾兩分鐘先出到呢???係咪想嚇死我???

成個人鬆晒,即時點左支老友記(綠more)慶祝下先…

雖則我成日都話唔想生,呢次又係一宗意外

但當我接受左呢件事之後,突然又話可能有事,我又都會好緊張架播…


由知道我老婆有左開始,o係呢段時間入面,除左佢個肚越黎越大之外

我發覺我心態上都逐漸逐漸咁出現左微妙既變化

插曲

知道有左之後,老婆就罕有地,非常有效率地去醫院排期(平時既佢係極之HEA既)



亦開始安排一連串既檢查,首先係檢查我地自己先,因為我地冇做到婚前檢查



為求快捷,就搵左間私家診所黎個<後補>婚前檢..^^

 

婚前檢好快就有報告,好彩一切正常<因為我成日都以為自己唔正常>

 

咁我心態亦調整完畢,就諗住開開心心去迎接迎新生命既來臨啦…



點不知過左幾日,到醫院個初期產前檢出左啦,姑娘打電話比是頭婆



話驗到<唐氏>唔合格,仲要同正常水平相差都幾遠…(即時上網睇左一大剷相關資料)

噢…………..



唔係掛……唔係玩野呀???



呢家野並唔係講笑架喎,於是即刻同醫院相約作進一步深入檢查



呢次快呀,兩日後就有期,但係份報告要等3個星期



咁咪即係要擔心3個禮拜???WA….呢3個禮拜咪好惡等???



咪攪,問下佢有冇D捷徑行呀???又真係有喎,3個工作天有結果,準確度97%(要加錢)



比你啦……差咁遠梗係比啦…..,

 

我就好衰既,所有野都會做定最壊打算,我覺得做任何事,點都要有幾手準備先好似安心D,所以就趁呢幾日查探左一D資訊(當然梗係唔希望用得著啦)



到左第3個工作天,返到公司好似比蟻咬咁….



到左十點幾,就收到老婆既WHATSAPP….

老婆:老公………………….



跟住隔左一陣都未有第2句,心底即時一沉…qx

突變

好耐冇見啦

話咁快結左婚8個月啦,婚後生活冇乜大轉變



因為結婚前老婆都差唔多係o係我度住咁濟,所以o係生活上冇乜分別,一切以平淡為主,亦係我想要既…


自從轉左朝九晚六工作之後,不斷肥胖既情況終於暫時停止下來,真係鬆一口氣(好彩都識停=_=”)


本來諗住呢個情況會一直維持住,因為悠閒既生活一向都係我嚮往既,


返工冇壓力,唔會好似以前咁受氣,間中去下旅行,飲飲食食,簡簡單單,幾咁舒服…


勢估唔到理想中既生活將會O係咁短時間之後切底改變….


O係兩個半月前,老婆告知我一個消息,就係O係我地既家庭中,將會增添一位新成員…


WA……..真係不得了,我當場呆左一陣,因為冇諗過會咁快有架喎…


自從決定結婚之後,攪屋企裝修,攪結婚,其實都幾大負擔


諗住比D時間回下氣先啦,係咪???點知緊接住就整壇咁既野,你都咪話唔震驚…


一連串需要解決既問題隋即湧現,塞滿腦子…


呆滯左一段短時間之後,心態自我調整模式啟動….


所有負面情緒慢慢散去….


冇錯啦,呢件始終都係一件值得開心既事,一定要正面地面對

只不過呢單野比我體會到兩句說話既重要性…


就係…


一次意外,足以致命

(因為我一路以黎都係一個非……..常安全既人)

但當我接受左呢個事實之後,突然又有一個嚴重問題出現……….