去到QE,登記交錢後,好快就去分流站,講晒我既情況之後,被列為緊急情況,立即打尖入去見醫生…
比醫生檢測完一輪之後,初步疹斷係藥物敏感,立即種豆,再即打左支類固醇抗敏針,然後再吊盬水,跟手等上房…
拿..見醫生有得打尖,上房就冇啦,不過都算快,只係等左4個鐘JE,但係QE真….係一處非常旺既地方,一上到病房樓層,好似去左戰場D醫療營咁,D病床通處都係,成條走廊都瞓晒人
小弟算好彩啦,可以入到病房………..既走廊瞓,但張床就係推我上去嗰張,窄到身都轉唔到…頭頂仲要對住盞燈?嘩~~~幾咁光猛
其實呢日我朝早食過幾啖麵包之後就乜都冇食過,而家又吊緊盬水,又餓又瞓得唔舒服,房內又不時傳出一D辛吟聲同怪叫,所以好不容易先捱到天光…
7點半有早餐送到,係一碗好清既粥,但餓左十幾個鐘,呢碗粥我覺得非常好味
8點零醫生巡房,我已經準備好晒呢排既病歷資料,成份掟晒比醫生慢慢研究
如是者,食,瞓,食藥,打針,不停循環,但因為我唔退燒,要幫我抽鼻液驗流感,人生第一次抽鼻液,所以唔知係咩一回事…
好快我就見到個護士攞住一包野行埋黎,裡面裝住既係一支大概5吋長既棉花棒
E…唔對路喎,家陣抽鼻液,唔係要將呢支咁長既野桶入個鼻馬???說時遲那時快,個護士一邊講”先生,會有少少唔舒服,忍耐一下,而家黎啦…”跟手就一野桶左入我個鼻既深深處…
啊………….
少少唔舒服???語言偽術呀…....醫護人員都用語言偽術,天呀………..
我只能咬實棚牙,用手緊抓著床柄,個護士喺我個鼻深深處鑽左幾下就拔番出黎啦,當我以為雨過天青,可以鬆一口氣既時候,護士哥哥又話:好,到另一邊啦….””
另一邊都要???噢…………..........
得啦,比人連桶兩野,我身與心都要少少時間去適應,於是重重地攤喺床度回氣
喺呢個時候我突然諗到樣野,我尋晚入院後一路都有食藥,個鼻好似完全冇晒鼻水咁喎,咁會唔會抽唔到鼻液???
拿…邪門呢家野呢,唔好話講出口,原來心諗都唔得既,護士哥哥已經又再出現喺面前:”嚴生,頭先抽唔到喎,要再抽過…”
“下???再抽過???????”
原來比人強姦並唔係最痛苦,最痛苦係明知人地黎強姦你,而你又唔可以反抗,仲要欣然接受嗰下悲涼呀…
喺呢個時候,我個鼻又再被強硬闖入
呀…………………………
經過左兩次被強姦,我那個原本收晒鼻水既鼻,因被外來物強行進入而連續流左15分鐘鼻水和刺痛左一個小時
食藥.瞓覺,打針,食藥,瞓覺,打針……去到第3日既早上…
醫生:嚴生,你身上既紅疹退得7788啦,我地唔知你因乜野敏感,只能將你最後接觸既兩種抗生素定性為藥物敏感,因為呢個可能性係最高既,另外今朝又探到你冇燒,你可以出院啦,我開D藥你返屋企繼續休息啦,我一陣去寫埋D文件就得架啦…
我當時除左不停點頭同講好呀好呀好呀,已經唔知做咩反應
即刻打比老婆報喜啦,又咁岩就黎到探病時間,於是老婆隔左一陣就過黎接我出院啦…
當我同老婆吹緊水等出院既時候,阿醫生突然急步走埋黎….
“嚴生,你份流感報告出左啦,係乙型流感,你可以選擇唔出院住,觀察多一晚,或者照樣出院,返屋企自我隔離”
我諗都唔洗諗就答:出院
醫生:”若然選擇出院,咁我地又要問下你,你接唔接受我地開(特敏福)比你呢?”
以我記憶,乜唔係甲型流感先要食特敏福既咩?乙型流感好似普通野黎炸喎…
於是我就問醫生,係咪一定要食特敏福?”唔係”
特敏福係咪一定有效?”唔係”
食左特敏福會唔會有副作用?”有可能皮膚會出紅疹,未必有既,有可能JE…”
頂….我就係皮膚出紅疹先入左黎,岩岩先叫慢慢好緊,若然因為服用唔一定醫得好既特敏福而又出番咪好ON9???
諗左一陣我就斷然拒絕特敏福治療,醫生跟住就千叮萬囑我,若然你再燒到過38度,就記得要再返黎醫院啦…
其實我咁抗拒食特敏福,背後係仲有一個好大既原因….
