我又唔知醒起身啦,又瞓到4點,原來個鬧鐘冇電,停鬼左,又游唔到水啦,shit......
起身之後開著個電腦,@左小寶,傾左一陣,見到個兩年前既舊同事,佢而家冇野做,so 就約左出黎食飯啦,反正我都冇訂去
兩年時間,冇乜點變,係肥左少少(梗係啦,唔洗返工),連個人都冇乜點變,所以都唔係好傾得入,佢依然係咁鐘意溝仔,祝佢早日願望達成啦,
好快咁食完餐飯就走左啦,本來諗住去飲野,但係又好似冇乜mood,都係返屋企算lu
好悶,好悶......點解而家放假好似愈黎愈悶,個人愈黎愈頹咁既??d鬥志好似唔見晒咁,唔掂喎,咁樣.....
各好友有冇方法可以解救下小弟咁呢??
得獎者可獲得廉價晚餐一份....哈~~~~
放假啦,放假啦,又唔知有咩做啦,而家個個禮拜放假都好似遊魂野鬼咁,呀.........如果知醒就去游水啦,晒番黑個人先,咁先似我d運程家嗎
我隻中指經過我""跌打聖手""既處理之後,今日好左好多啦,冇左咁腫,d瘀血又散晒出黎,又冇左咁痛,唔.......果然係名不虛傳....
哈....我諗我唔洗沉淪番落去汽槍度啦,因為班友仔企硬要星期一晚先打,點都唔肯改番一晚半晚,咁我又唔想第日返工咁辛苦,咁咪唯有唔玩囉,襯而家d癮未返晒黎,絕對冇問題,忍到手...
今日o係公司講開槍,哈~~~真得意,原來有個女工友而家個老公係打game識返黎既,話說以前佢跟d fd出去同人打game,打下打下咁就熟左,佢仲話發覺佢老公,當時成日都唔係同佢team,同埋佢老公特別鐘意追住佢黎射,咁終於射下射下,咁又結左婚啦,你話幾咁奇妙呢,女仔玩槍真係好少有,咁都可以玩到個老婆番黎,真係佩服,拿.....呢d咪緣份囉.............
世事無絕對既呢..............
尋晚終於都食左一餐好飽既晚餐,我成8點先入到愉景灣,但竟然係最早o個個,o係開檔途中,佢地先分別返到,差唔多成9點先食,有蝦,鵝肝同牛扒,仲有一ja 配菜,好飽..........
家明就照慣例,一早就已經醉左去瞓啦,大佬佢地都未走就已經攪掂左啦,冇料.......
跟住就同兩個家姐o係度飲酒吹水,嘩........傾下傾下,3點啦擋,仲影左好多副相,笑死人
今朝瞓到2點先起身,落街食個lunch後,就去左家明間新屋參觀下,wow~~~~~落地玻璃無敵半山半海景,仲有penthouse,睇黎下次攪party都要轉地方囉,不過記住唔好飲咁多住,唔好咁早瞓喎,哈~~~~~~
跟住出番旺角食左個龜零膏,本來想行下先,不過突然間覺得好冇mood,都係返屋企lu.....
兩日假,就咁就放完啦...........
今朝冇塞車,一早去到茶餐廳,車........一個人都冇,原來d早餐腳放晒假,不過見到個第2個部門既,叫(係咁椅)吹左兩句水,食左個孤單既早餐..
不過講開又講喎,""孤 獨""呢兩個字呢,其實我o係早兩年已經習慣左架啦,特別係呢個世界有左online game呢樣野之後呢,孤單呢樣野就好難再會有啦,假設你係一個傳說中既""隱 蔽 青 年"",一個朋友都冇既,但係你 o係網上可以有好多朋友,識得耐左甚至有機會成為真既朋友tim,因為你地會因個game而有共同興趣,共同話題,o係不知不覺間已經建立起左一份友誼
我唔否認有部份人係好渴求同重視愛情,呢種感覺係唔可以同友誼相比既,但係愛情係一種絕不能強求既野,既然不能控制,不能心急,不能勉強,何不放開一些,去認識多些新人,新事,新物,或好好去享受一下朋友之誼,總比((好像餓狼一般,流滿口水地去獵食異性,去相睇或是不設實際地去憧憬終會有一個條件無敵既白馬王子主動黎追你))來得自然,舒服.....
wow........終於捱過左兩日地獄式既生活,真係好好好倦,可能因為經濟好,所以d人好肯洗錢,連d咁貴既餐廳都可以爆到咁,所以你話香港幾多有錢人啦
其實做左呢行咁多年,節日對我黎講已經係毫無意義,因為o係父,母親節我永遠陪唔到老豆,老母飲茶,情人節我永遠陪唔到女朋友,過時過節我永遠都冇得去慶祝,因為我要返工,呢一個遺憾,亦只有一斑好好既朋友同屋企人先可以諒解到我,只有佢地先知道,我都係為左啖飯姐,你估我唔想放紅日咩??o係呢度向我呢斑好朋友同埋屋企人致敬....
今日同阿惡通過電話,佢話阿媽呢排身體唔係好妥,同埋個人又好負面,好似想交低晒d野咁,其實好老實咁講,人活到一把年紀,做人仔女既都要做定一d心理準備,因為呢個始終係人生必經既階段,要黎既,你阻都阻唔到,要走既,你留都留唔住,面對現實其實係我地每一日都做緊既,分別只於在事情既喜與悲,樂與怒姐
香港而家又全民皆股啦,乜鬼野人都走晒去買股票,一有新股抽就個個都好似有錢執咁,唔理3,7廿一都走去遞form先,97到而家又十年啦,十年一個循環,你估幾時又會有新一代既股災出現呢??
十年前既我同十年後既我又有咩分別呢???除左老左之外,幾乎都係一樣(咁失敗.....)
我又瘦左啦,今朝o係locker磅一磅,wa............嚇到我面都青埋,得132磅,除左3年前o個次之後,呢期係最輕架啦,喂...我話晒都有五呎分八吋半丫,有冇攪錯呀,你話同支火柴有咩分別丫??唔通我(命範火柴孤星,無伴終老,瘦猛猛一生),呀.........我醒起啦,我記得我好耐之前我阿媽係用火柴黎點香架,唔通佢鉈緊我既時候用火柴點香點得多,所以有影響??唔.......有可能,有可能.........
唔知遲d會唔會瘦死呢??
後日就係母親節,黎緊呢兩日既訂位已經進入恐怖階段,星期日仲over左tim,睇黎呢兩日又唔知要o.t o 到幾多點lu,希望過埋呢兩日,d手手腳腳可以仲係自己架啦.
唉......又要報稅啦,我呢d窮人都仲要交稅,真係o係乞兒兜攞飯食啦..
今日終於都睇左蜘蛛俠啦,之前d人都話係一般,又真係麻麻地ja喎,得個長字,做左兩個幾鐘,又唔覺得緊張,又唔覺得精彩,冇乜特別感覺,真係好一般,不過佢講出左蜘蛛俠並唔係無敵既,無敵o個個係泥沙人,因為佢都唔會死既,又識變大變細,散左又砌得番,邊夠佢玩呀?而個蜘蛛俠就弱得多啦,冇乜攻擊力,除左跳黎跳去同o係隻手射d一篤篤白色野出黎之外,就冇乜阪釜啦,剩係識用拳拳腳腳,咁我提議佢應該去學番d少林功夫,咁樣應該會好打d,第四集應該整套(少林蜘蛛俠大戰武當生化戰士)哈~~~咁就有睇頭啦
睇下遲d神奇4俠續集有冇驚喜啦,呀....仲有加勒比海盜,Die Hard 4,同變形金剛都排緊期啦,阿安,阿碧,辛苦晒你地啦.......
唉......呢期都唔知咩事??d手手腳腳好似用豆腐做咁既,係咁椅high一high就已經又藍又紅又紫,今日又撞瘀埋隻右手指公啦,隻腳指都仲未好番呀,講開隻腳指,今日唔覺意掂到,都仲係劇痛,睇黎應該有d問題,要follow下先得啦
今日又有新一年既trainee登場啦,好似有成10個咁多,大部份都係女,多數都要train F&B,恭喜晒,恭喜晒,恭喜你地咁多位社會未來既希望正式踏入地獄式既飲食業之旅......o係呢一年內包你地嚐盡===做到痴根,忙到失暈,跑到抽根,以為自己變左超人既極級快感===保證為你地帶黎畢生難忘既經歷....wellcome
聽日又有2000萬金多寶,又係大家出動既時候啦,記住買啦,咁多位老細.....好運,好運......
一如以往,六合彩終於都比人中左,不過我都有中,廿蚊,好過冇啦,ok啦
唉.....年頭o個陣睇過d乜Q豬年運程,話我今年冇橫財運,真係準到嘔,我今年d馬仔都未贏過,個個賽馬日都係輸既,唉.....真係要忍下手啦,雖然玩得細姐,但係咁樣長輸法都唔係辦法,都係抖一排先得啦,唔係乞食都似呀
有一日同阿妹傾電話,先記番起佢係一個對某方面極之執著同硬頸既人,同(阿邊個)o個種左搖右擺完全係相反,由其係當全世界都反對佢返老公身邊,差不多被完全孤立,冇晒親人,冇晒朋友既時候,佢o個種義無反顧既死硬派堅持,問心講,真係唔係人人做得到,相比起(阿邊個)講話受到o個d咁既所謂壓力,哈~~~~~~
佢o個日仲講左一段好正既說話,((車........全世界都話我老公係衰人黎
架啦,咁我係鐘意佢就鐘意佢,你地點講我都係鐘意佢
架啦,日日都有人同我講佢幾衰,幾唔好,我邊理得咁多
姐,唔通比你地講下講下我就會唔鐘意佢咩??唔好傻啦,
我呃到你地,都呃唔到自己啦....)) 有料......
算你啦,仲以為你有異性就冇人性,好彩o係我唔老like o個陣時,你都識出下聲,有番d良知....
((五.一黃金週))
係服務性行業既災難週,呢個週真係威力強大,由尋日開始,日與夜都爆到九彩,O 足兩日 T,今晚收工o個陣,d 手手腳腳好似唔係自己咁既,成個人散鬼晒,好彩今日放假ja,有得抖一抖,唔係真係死都似呀
唉......蜘蛛俠終於都上啦,好想睇,但係搵邊個陪我睇好呢??諗爆頭啦,呢次...
好倦,聽日好想上大陸揼骨,但係又好驚多人,同埋成身傷晒,呢度瘀o個度瘀,點揼呀??都係算吧啦,當慳d洗囉
而家唔洗拍拖,真係要儲番多個錢,你知啦,呢個世界d人好現實家嗎,講o個陣就天下無敵,超.........
阿衰妹你做咩事入兩個禮拜醫院呀???作死你呀,入咁耐,實唔係野少啦,咁都唔自動報料,你死...我放假啦,打爆你個電話
