久違了的母親節

由細到大,對於父,母親節都冇乜特別感覺,剩係覺得係一個家庭聚會既藉口



自從皇太后離開左之後,母親節就更加唔關我事,所以我一向都冇留意呢個日子



今年就唔同啦,因為我老婆第一年做人母親,一早佢已經問我點慶祝啦,



我心諗:慶鬼慶馬咩,母親節係星期日,星期日我不嬲都係用黎湊女架啦,同埋佢自己都要返工啦,慶個屎忽咩???

原來佢o個日收早,就同阿女落公園遊一陣啦

and我捉左阿惡過黎煮野食,同埋象徵式咁買左個蛋糕食下咁啦…




人大左,過乜節都好,簡簡單單就最舒服…

濕疹的煩惱

可欣不經不覺就9個幾月啦

好似好快,但係又好似好慢…


覺得快係因為就快佢就一歲啦,諗番佢出世o個日就好似冇幾耐之前咁,原來已經差唔多一年前…



覺得慢係因為呢9個月並不易過,由佢早產開始,頭個幾月都要留o係醫院瞓氧氣箱,每日睇住佢小小既身驅,身上插住一條二條喉管,d儀器間唔中就響下,真係心都痛埋,等待佢身體追回進度既時間真係特別漫長,但可幸無驚無險…




到佢返左屋企,o個種無分晝夜既餵夜奶生活,佢日夜顛倒既作息時間亦都差d攞左我條命,同埋因為佢係早產BB既關係,夜奶期亦相應特別長,佢每晚半夜扭計既長氣程度亦險些將我迫入<青山>



但令人安慰既,touch wood佢冇乜大病痛,最令我地困擾既就唯獨係佢d<濕疹>

由今年年頭開始佢塊面就開始出現濕疹,收集左好多媽咪既意見同方法,但情況時好時壞,直到農曆年頭,情況仲開始惡化(已經成塊面R到損晒啦)

塊面仔爛晒呀,陰公...



醫生又睇過,同埋我地已經試過無數咁多方法,搓唔同既野啦,搵野煲水佢沖涼啦,乜都做齊啦,真係冇晒辦法



突然老婆諗起有一次同阿女去健康院,有個婆婆見到阿女塊面咁,就介紹左個中醫比佢,話佢個孫都係睇呢個中醫睇好既,我地一路都忽略左呢單野,o係冇晒計既情況之下,於是就姑且去試下


不過睇呢個中醫真係要有d耐性,佢冇得預約,要晨早去排隊,先到先得,佢睇症仲要超慢,所以閒閒地等個零兩個鐘都走唔甩架啦,…


不過你唔好理,佢又睇得你好o個下冇計喎,佢只係開左幾包老年咁大包既山草藥比阿女返去沖涼(total 5日藥),仲有d藥粉用黎(嬸)o係d損左既位


沖到第三日,阿女已經有明顯既進步,沖晒5劑,d傷口已經埋晒口

叫好左好多架啦,剩番D疤

wa….真係開心到我呢…好耐冇見過阿女完整既面啦…


隔左幾日再去睇多次,清一清佢,攪掂….

BUT……..因為呢個濕疹而令阿女有個後遺症,就係(R面)


可能因為佢已經R慣左,而家佢一覺得熱,扭眼瞓同發掹都會R面,嚴格上黎講應該係抓面,因為佢係會發晒狂,出盡力咁去抓既,所以時刻都要提防佢呢個舉動…