有冇攪錯???????

YAHOO BLOG執笠???



有冇攪錯呀???



我由2006年寫到今時今日



當年O係呢度認識既BLOG友差不多全部都冇再寫,離開晒...



我都仲堅持留低,當中既生活點滴多不勝數



我間中都仲會開黎睇下...



做乜執呀???執第二範都唔好執個BLOG丫嗎...



反對呀......

hea爆樟木頭

上星期六,因為大佬生日,所以部份家庭成員上左大陸兩day

 老婆冇假,所以將佢同可欣放左o係外母度,我就一支公跟大隊去玩啦…^^

去到羅湖再轉廣深,非常快,23分鐘就到…樟木頭

先去酒店check
in,因為大佬識人,所以我地比普通房價錢,全部住行政樓層

大佬間房仲再離譜d,有個廳tim..

Check完In都差唔多6點啦,要搵飯食啦…(大陸人早食飯,再遲d就乜都賣晒架啦)

 因為大佬黎過幾次,佢都熟路架啦,所以帶左我地去一處(山卡啦)既地方食農家菜

D食材全部自家養既…

 種類並不多,都係d簡單既菜式,但係做到最重要o個點,就係….好食(掛住食,有d唔記得影相)

仲有就係…………..超平 

呢餐連埋飲左幾支啤酒同蘋果醋,每位盛惠….50個大洋

 食完飯,有個老年咁大既商場,入面有個老年咁大既超市,又足夠我地行左幾粒鐘啦…

 行完超市…唔好蝕,再去燒蠔,一於片盡佢……………

 返到酒店,指定動作,各自返房沖涼,跟手去大佬間房集合

飲……………………….

罕有地,今次冧左4件,我係其中之一,仲要昏迷左o係大佬房,借宿一宵,真….失禮

雖則冧左,不過第2朝竟然起到身食早餐喎,太神奇啦….

食完個早餐,抖左一陣就集體去揼骨,全部人都去按腳,我就去桑拿…

 

兩點半集合飲中茶,飲完再去行街,行完街又到食飯時間

今次食”豬肚雞煲”

其實都係打邊爐je,我就覺得辣雞煲好食d(只因我鐘意食辣je…)

食完就回程啦,呢個行程我既洗費五舊水都唔洗,呵~~~~

小寶貝一歲了

7月28日

我個小寶貝…可欣一歲啦

回想番佢出世當日,比預產期早左兩個幾月,真係有D殺我地一個措手不及,仲好多野都好不一樣

出世時只係一個3磅多少少既包皮骨人型生物,人地個個BB出世都可以同爹娘影張合照

佢一出世就比醫生搶劫左,連抱都冇得抱

每日去醫院探佢只能夠隔住個箱,望住全身插滿喉管既小小身軀,真係有點傷感

頭十幾日,每日既情況都有可能有好大既轉變,今日3條喉,聽日去到又多左一條,後日去到又多左一舊野,內心不受控地充滿擔憂

可幸見住佢慢慢咁長返一點點肉,d骨頭冇左咁現型,內心才開始平靜一點

好不容易捱完38天既醫院生涯,返到家又一番新既挑戰

曾幾何時差點將爹娘折磨至崩潰,但最終又咬實牙關地過

曾抱病入院3天,又高燒,又肚瀉,又大便有血,又被姑娘折磨至差點瘋了

心痛到不得了...

曾氣管炎,要服用抗生素,渡致胃口大跌至接近絕食,瘦左成個碼

由一舊飯,開始識轉身,開始識企,開始只係識向後爬,開始曳,開始大叫,開始識發脾氣,開始唔鐘意抱,鐘意周圍爬,開始識鬧番我轉頭…

短短一年,點點滴滴實在多不勝數

有開心,有激氣,有擔憂…

未來既日子將會有更大既挑戰,面對更多既問題,更多既難關,but

whatever,只要你健健康康,開開心心咁成長

一切都變得不重要