戰後報導...

等左好耐既戰事o係尋晚終於都順利進行左啦,雖然有一段小插曲,但係算啦,最緊要玩得開心...
我地既處男飛師兄尋晚set恆晒個look咁落場,果然係輸技術都唔可以輸裝備
可惜阿處女carol小朋友收唔到工,所以破唔到處,唉~~~真係曳曳地.不過冇法啦,搵食緊要,唯有下次先破啦...
我堅呀,尋晚狀態大勇,場場都park低幾件,有兩次比人kill都因為正在換彈匣,通常我都係周圍走,跳黎跳去,d人都打我唔中
玩2抽2既時候仲完全冇輸過,真係過癮死
始終巷戰o個種步步為營既感覺,確係有佢既刺激之處,同打大場o個種亂槍掃射既快感,真係各有各既特質同吸引...
新手game評:(飛師兄)
始終都係第一次打,難免會有d迷茫既感覺,唔知點做,唔知走去邊,唔知點走位,唔知點互相cover,呢個情況絕對正常,因為對個遊戲同埋場地都好陌生,始終都需要時間去適應,而家有左個初步概念,下次打個意識就會強左d架啦,同埋中多幾槍,比人打多d就自然會識點打架啦....

仲有呀,飛師兄,我呢個係輕裝備look,未齊野架,打大場o個日仲會多d野架...

一觸即發...

今晚係carol同飛師兄既槍壇處女第一擊,
不過,好可惜,因為多野做既關係,carol而家都仲未知收幾點,
唉~~~~真係陰公,希望佢收得切工,可以準時join到我地,一齊去發洩下,爽下啦
今晚槍壇老手阿文亦都會第一次join埋我地玩,希望呢個兇殘既槍手今晚唔好殺咁多人啦,留番d比我丫,唔該...

今晚好似話tatol有16個,以細場黎講算幾多人架啦,會迫少少,
佢老闆,開頭吹雞o個陣個個都話唔去,諗住成唔到團,到岩岩搵齊10個啦,d人又唔知o係邊度走出黎,好彩臨場又少番幾個,如果唔係成廿個,真係行兩步就撞到人o個隻...
好.....各隊員準備就緒,警察又好,賊又好,恐怖份子又好

00:45     open fire.......

蝕左...

你地估下上面呢ja野要幾多錢????
佢地分別有一支白光電筒連老鼠尾,MP5手柄連電筒,M4鏈夾兩隻,MP5孖裝鏈夾一隻,彈樽連彈兩個,護睁,膝兩套..
咁鬼多野夾埋都只係五百零蚊,WA.....真係痴線架.......
事緣今日落場本來諗住瞓覺既,點知阿西撩我落深水埗,咁岩又諗起要幫carol同飛師兄買野,咁就落去殺下貨啦....
支手柄連電筒買平左成百蚊,本來都幾開心既,不過去買白光電筒o個陣就好唔冧啦,上次阿豪帶我去買,價錢係$240一set,我覺都ok丫,咁今日本來諗住去返o個度買,不過我忽然想睇下第2檔,埋去問一問,再計一計,個靚女竟然話$196,跟住仲自動話$190得啦...
我頂丫............我連價都冇講過就比我o個陣平左$50,(註:set野係一模一樣既)
o係o個一刻我好(鄧)飛師兄高興,但同時間個袋dum到爆咁濟,一支2百零蚊既電筒,竟然可以差$50咁多,我真係想去返上次o個檔打死o個兩個sales,食水咁深都有既???
呢個故事教訓我地,去鴨寮街買野,就係要睇定d黎食,唔係個"春"就會隨時都會受到自己既傷害架啦......

清兵...

幾日都冇updated啦,又冇乜去探d blog友,真係曳晒...
早兩日同左d blog友出黎飲野,重申<<<真係飲野>>>唔係劈,都唔係唱K,剩係飲野傾計
wa.....真係估唔到,o係我收工打比carol o個陣,心情幾咁忐忑呀,我心諗如果佢又話去佐敦neway咁點算呢??一聽到係去河內道,wow~~~掂呀,成個人定晒
今次飲野呢度,我好鬼喜歡喎,地方又企理,個氣氛又舒服,真係合我心水,blog友們,一定要再黎呀.....
o個晚靜靜地咁傾下計,同平時既喪劈,喪唱,感覺平和好多,隨住幾杯到肚,話題亦開始偏向感性起來,由互相分享開blog既原意,進程,到話題踏進感情既領域,大家亦開始收起平日的嬉皮笑臉(除左恐龍間中依然會攪事之外)
其實大家有時能夠交心地傾下心底話,係可以增進到大家既友誼,因為大家對彼此既了解又深左,
咁當然,能夠大家都會分享,都會開金口,就當然係最好啦,但若你覺得還未是時候,我們亦不會介意
其間我向某人作出左一d分析,不論能否一針見血,是否過於偏激,其實o係我心內都係以一個中立者既立場去思考,希望可以一定程度上結予到一種啟發(後尾諗諗下都係覺得,未得你同意,其實唔應該o係咁多人面前講你,sorry)
因為人好多時會當局者迷,或不自覺地逃避現實,逃避面對很多事,我覺得總需要一些""清兵""不要命地去把一些事或物做出或是講出,好令人能記起一些事與本能,從而能及早去處理與解決
""清兵""我自少已慣做,亦因這性格令我不能平步青雲,但我無悔擁有這份勇悍,因我能藉著這份執著,在每一個朋友面前我都能把頭抬高
因我對你們講的每一番話都是出自""心""  與  ""真"""

新成員的誕生...

恭喜晒,恭喜晒........
恭喜carol同飛師兄已經正式成為我既新隊友啦,因為今晚佢地已經擁有自己既佩槍啦
分別係飛師兄既::Glock 23

同埋carol既::M199(可連發)

兩支都係全金屬版
但係有一點幾得意既,就係carol支M199重大支過同埋重過飛師兄支Glock23,其實佢地係咪應該調番轉黎用呢??
不過槍款呢家野好個人既,係鐘意就鐘意架啦
歡迎佢地加入恐怖份子份子既大家庭
其實佢地想扮差人都得既,不過d野就會貴d囉,同埋我地大部份人都係恐怖份子,如果佢地飾演差人,就要打晒我地咁多個架啦,你諗你啦......
呀.....仲有呀,carol仲買左支國產MP5-J
wa......呢支真係唔講得少,槍仔細細,仲要係膠身,竟然爽穿兩面罐,落場o個陣真係要小心呢個人....

夜會準新郎,發掘新隊友...

尋晚同今晚公司staff party,因為分兩晚既關係,所以每晚都有一半人去
今晚得六個人開工,本來都唔係好多訂位,不過d walk in越入越勁,做到我棄城咁濟.....
原先今晚收9點,終於O.T到11點先走得,真係shit爆......
本應都可以早d走,不過個死哨牙人渣o係咁既情況之下都仲要o係度hea,如果佢快手d,我就可以早d走啦...
因為今晚阿準新郎""豐哥""約左我食宵夜呀,所以咪趕住要收工囉,唔係??仲有得O呀.......
一收工就打比豐哥,睇下佢地o係邊頭浦,點知一聽到真係火都黎埋,竟然o係牛頭角,我頂丫........
你地係咪人黎架???要一個開左11個鐘頭工而導至筋疲力盡既男子,山長水遠由尖東黎牛頭角同你地食宵夜,仲要不停咁叫我""搭的士啦,搭的士啦""
我搭你老鼠....我直頭想打爆你個頭呀.........
最尾梗係搭地鐵啦,唔洗你等呀???

一去到,阿豐哥個look真係嚇死我,驚嚇指數有3粒星,wa......肥到隻"芝"咁,成條頸唔見左,我好比心機咁搵左好耐都搵唔到,果然係一頭不折不扣既肥"芝".......我就問其他人,""點解一個人可以變得咁肥架???""然後佢地好齊咁答我,""個個都肥左,係你冇肥過之嗎.....
我心諗,""呀....咁又係喎""仲要瘦左tim..........
鬼咩,份工咁Q死辛苦,日日都做到隻狗咁,倦都倦死啦,睇幾時架ja???(又做得唔開心)
同佢地傾傾下,哈~~~又比我搵多兩隻war game腳,因為佢地以前有打開,但係又停左好耐冇打,咁又比我撻番著佢地啦,再加埋carol同飛師兄,我地個team又多左4個人lu.......
wa....咁下次打大場,一架24座van咪唔夠坐???要搵d人自己揸車先得啦........

稀客來電...

今晚9點幾轉來電話既震動,因為開緊工,所以聽唔到,但過左一陣偷偷望左個來電號碼
原來係一個好耐冇見既朋友,我心諗呢個朋友如果主動咁搵得我既,一定係發生左一d驚天動地既事啦.....
心裡面諗左兩,三個可能性,但係最大可能既就係............
一收工,衫都未換就即刻覆佢,電話一接通,聽筒傳黎既依然係一把十年如一日都冇變既傻更更聲音,佢一開口就問"""喂,今個禮拜有咩攪呀?????"""
我心諗,痴.......線既,呢d問題只有我問人既je,阿好友絕少會問呢d問題,氣氛有d怪怪地,哈~~~你玩野,我咪陪你顛下,吹下水囉,睇你吹得幾耐??
講唔夠幾句,咪終於入正題囉,吹水始終唔係佢既強項.....
果然同我既估計一樣,"""""結婚"""""
呢個朋友結婚我會特別為佢高興,因為佢曾經有一段時間個人好冇自信,亦因為咁而令過一段感情夭斬,好可惜.....
今日收到既婚訊,亦代表佢已經可以再企番起身啦,好開心........
但係回望身邊呢斑識左廿年既兄弟,大部份都已經成家立室,就只剩下兩三個,而家連佢都攪掂啦,睇黎如無意外,我咁多年都一直避而不做既伴郎位置,都要破處啦.......
shit......又要做西裝,又要著西裝,呀................我最怕著西裝架啦.....仲要係大熱天時著...真係攞命.....

唉~~~~鬼叫我識左你廿年咩..............
不過點都好啦,o係度都要大嗌一聲....

""恭喜晒呀,豐哥.....""

這一個夜...

唉~~~~尋晚又過左個錯晒既夜晚......
事緣尋晚約左blog友們飲野,開頭諗住傾下計,摸下酒杯底既je,
點知收工打比carol,佢話去佐敦neway喎,oh...shit............
我心諗""下???佐敦neway???呢處鬼地方黎架喎,好邪門架喎,次次去親,走o個陣個天都係光既,我聽日仲返早tim,前兩日先遲大到,再遲真係死得人架喎""
但係我呢個憂慮只係維持左兩妙,就已經好磁性咁答佢,""好...一陣見..""
你話死唔死丫???成日以為自己有副不死既身軀,往往都將"生"屎"通...通...拋諸腦後.......
不過我尋晚都已經就住黎飲架啦,一時就傾計扮感性可以唔洗點飲,到後尾仲直頭用唱歌黎揮發體內既酒精tim.....
曾經o係四點鐘既時候,我打算走架啦,連錢都擺低左架啦,但係唔知點解走極都走唔到,我都話呢間野邪門架啦,再加上係農曆7月既關係,令到呢間卡拉ok邪上加邪,終於就將我對腳吸住左啦
唉~~~~真係曳晒呀...............
跟住又係去左食野,曳上曳........
你估終於幾點返到屋企????




shit...............咪又6點幾囉.....
又係瞓得o個兩粒鐘就起身返工,不過我又醒到喎,但係就照舊d酒氣未散得晒,個人呆呆地咁...
所以今日開工特別辛苦,個魂魄完全失散左,同埋今日星期日又旺呢,所以而家好..好..好倦........
寫完個blog,再食d野我就破天荒去瞓覺架啦
都唔知幾耐冇試過兩點前瞓覺.......
各兄弟姊妹,早抖啦..............

身中多刀.....

我今日遲到左個幾鐘,仲要係得我一個人返早
唉~~~~原來唔記得較鬧鐘,真失敗
返到去比人照左一輪肺,原來前兩日我背脊比人插到阿媽都唔認得,再加上今日失更,
呢d咪""黑仔王""威力囉........
聽日都係返早,不容有失,而家即刻瞓............早抖,every 波地

16號晚...

頂........我今晚終於都係睇唔到""導火線""
因為阿suki姐既老人痴呆症,((俗稱:死老野冇記性))((only for her))又發作啦,又無啦啦失憶啦,佢老闆尋晚講到實牙實齒去,去,去.......,今日打比佢,佢話有約喎,仲要話""車.....飲緊野,梗係乜都話好,乜都話得架啦.....哈~~~~~"""你話係咪想當場打死佢丫.......
我對呢個朋友要從新估計啦........
今晚同飛師兄去左睇槍,手槍未睇得掂,因為佢覺得形o個支d力唔夠猛,要從新揀過
至於auto,由原先既"k仔",變左而家既"M4",點解??因為""K仔""冇得加配件,"型"既指數下跌左,
而""M4""呢,連埋魚骨,滅聲,棍仔,大尾柄,一大壇既準星,一個字"""型"""
如果你有錢,仲可以加埋電筒,laser........,兩個字""""型爆"""""
如果比我o係深水埗搵到呢個model,仲會再平d,以上呢個""型爆""組合全部加埋晒都只係一千蚊上下,一個字"""""抵"""""
阿carol,唔該你d效率高少少,快d去揀款啦,我地一齊去食大荼飯啦......

睇完左槍,就join埋carol地一齊食飯,食乜Q野土耳其薄餅,妖.....錯晒........總之就唔好食啦,唔講啦......
跟住就例牌去飲咖啡,o係o個度玩左d好耐冇玩既小遊戲,其中一個就係層層叠啦,玩到個個都""時Co雪o雪"",""兒E牙牙""只係玩左一鋪,已經死左好多細胞同少左好多心血啦,不過.......都幾開心既.......
破天荒,11點就散啦,good((我聽日返早呀~~~))


呢度係開頭黎ja,後尾再搭高左8層到啦,o個時因為太緊張,個個都屏息靜氣,所以都唔記得左影相囉....

早起.....

尋日返直落,收9點,收左工就出左黎join carol佢地飲野,原先本來係約睇戲既,佢條粉腸竟然唔記得左,真係錯晒(今晚一家要睇到)
尋晚又識左個新朋友啦,係suki個fd,叫阿蟹,又係好玩一族,飲死罷就o個隻,講起飲酒,我尋晚就曳啦,可能直踩左咁多個鐘,又冇食野,由9點幾飲到點零鐘已經收左皮啦,眼瞓到死咁濟,一返到屋企bang一聲就瞓左覺啦..
瞓到今朝9點幾,就比阿爹娘嘈醒左,望一望個鐘,wa........9點半,喂,我今日放假架喎,不過可能因為早瞓,所以都瞓唔返囉,唉~~~都唔知幾耐冇試過放假咁早起身,真係錯晒......
起左身,好自然咁就開msn,第一次見到飛魚媽媽,but因為佢工務繁忙,所以只係打左個招呼je,有機會再同你吹水呀...
係時候落街食個早餐啦,再好好咁plan下今日個schedule先.....

新配件...

尋晚飛師兄同我講話買槍,咁岩今日又約左阿豪落深水埗喎,咁就幫佢留意埋d"國狗"既價錢
呢頭d價錢真係好飄忽,日日都可以唔同,不過都係屬於抵玩既,飛師兄話鐘意"k仔",一問......$260,痴.....線架,唱一晚k既價錢,真係新手佳品
點知睇睇下,阿豪又買左支M4系列既野,4佰5,大大支,又有魚骨,又多野跟,簡直係抵到喊,攪到我都突然鐘意左M4系列,死啦....咁買AK好丫?定M4好呢?爆頭,爆頭.......
不過我都幫我支MP5增加左d新配件,就係電筒同埋500飛錬匣啦,個匣先離譜呀,$35咋,係咪傻架......
一返到屋企,即刻set黎睇下,wa......形呀..........................
嘿.......我下次打,唔洗再盲摸摸啦,

百厭的颱風,兇狠的戰士..

因為呢兩日十分之繁忙,尋晚去左唱颱風k,今日又約左Alex佢地宵夜,所以冇時間去探訪各blog友,真係唔好意思
o係星期五既下晝,o個個頑皮既颱風竟然做左衰仔,食回頭草,仲攪左個8號風球出黎,攪到全世界臨急臨忙趕收工,(當然我就除外啦)令到香港多處地方交通坦(換),電訊服務亦嚴重受到影響,因為我有兩個家姐住愉景灣,想打比佢地問下咩環境都打唔到,所以話呢,打8號風球打到咁多麻煩野,"恨"黎做咩呢???
每有打風落雨,我o個度都旺到死,更何況打風,更加係不知所謂,真係害人不淺既8號風球.....
因為黎緊係鬼節既關係,而我地打大場既位置又o係荔枝莊隔離,有d隊友因為怕左d靈界既朋友,驚越打越多(人),所以將會停戰一個月
但係有d兇狠既好戰份子覺得停一個月就比把他殺死或割他o者o者更殘忍,所以已經謀密緊book細場玩,實行手槍戰都唔放過
唔怪得呢個世界咁多恐怖份子啦.........

小生命...

好友"立"兩兄妹在過去兩個月分別誕下一女,所以今日約埋"三井,安哥","阿pig"上左佢屋企探佢地
一如所料,阿立兩公婆唔o係香港,剩係見到佢爹娘同阿麗je
冇見阿麗幾個月,wa..........佢既size急劇膨脹,見到佢撓埋腳坐o係梳化個樣,哈~~~真係成尊佛咁,好攪笑,本來想登佢張相出黎,但係為顧及佢既感受,同我既生命安全,都係唔好啦..剩係比d BB相你地睇算啦.....


阿sam同阿麗既結晶""敏晴""

阿立同唔知邊個既寶貝女""雨霏""(hee~~因為我都唔知邊個係佢老婆)

呵.....欠..........邊鬼個嘈醒我呀??????

哎吔....哎吔.........你唔係就係...........

黑仔王.......嗚...嘩........................呀.................................

你睇,我個頭jell得幾恆,幾咁rock n roll,yo........我得兩個月大ja

而家已經練定彈結他既姿勢啦..wo~~~~~

都係唔好理黑仔王啦,繼續瞓先.........

練埋揸咪,學埋唱歌,都係做主音搵到食呀......hee~~~