車輪逍遙遊...完

睇完車輪7子其他成員既網誌之後,我已經笑到……….

咀唇爆裂,面部肌肉嚴重失控,口水長流,淚線分泌失調,四肢痙攣
生命力已經流失左大半….
所以黎緊呢篇,我會一反往常風格,正正經經咁帶大家睇下風景同好簡略咁講下個行程,比你地睇下我文靜既一面……

當日一早o係東涌集合,今次多左個新相識既成員,就係阿靚女小鈍豬.,亦即係車輪豬啦…不過聽講話佢係機械人黎既,因為行山既前一晚,佢好似去左劈,仲要劈到朝早6點,洽得o個一陣就出黎同我地癲啦,比我更加恐怖,如果我係""不死蟑螂"",咁佢就係""機械蒼蠅""啦.....

((水哥...有d咁靚女既blog友,一早就要帶出黎大家認識下啦...))
我地食完野,買完野之後,就搭左一程10分鐘既船去沙螺灣,一去到,各隊員已經開始發癲啦,紛紛亮出自己既兵器,發左狂咁亙片,好慶幸有兩位帶備腳架既專業攝影師,令到我地可以企定定咁影番d團體相…

.仲有今次處女下海,話成世人第一次行山既阿妹(車輪妹),呢位年青人既體能,完全比我地呢班”一支花”拋離,不過唔緊要,人…總會有第一次,你仲有無限既青春,仲有大把日子比我地折磨,黎緊既日子,我地會將你變番一個真正既…..少女…..

o係沿途,幹勁十足既 車輪屙 先生,不停地表演佢既幹勁,一d高難度動作頻頻出現,飛天.遁地,跳橋.攀石,十字沿垂,湯馬斯全旋,凌空轉體69週半頭落地樣樣齊,簡直令人嘆為觀止,拍案叫絕,尖叫不斷,佢既全程投入,簡直就係時下年青人學習既榜樣,不甘寂寞偷食師奶迷戀既甜心,黎….唔該比d熱烈既掌聲…啪啪啪…啪啪啪….啪啪啪…..

我地行行重行行,行到中途見到有檔我地夢寐以求既餐旦麵檔,於是立即施展輕功飄埋去,二話不說就叫野食啦,跟手仲舉行左一個集簡單,隆重,豪情,溫馨,惹笑,酷爆,刺激,溫情,騎呢,瘋狂兼而有之既
””飛師兄降臨凡間紀念日慶祝會””
o係個慶祝會包含既節目非常豐富,一眾賓客要帶上美輪美奐,名貴大方既皇冠與眼罩,o係食物方面,除左蛋糕,我地仲有餐旦麵,油菜同埋老翻A貨蠔餅,仲有82年既可樂,90年既雀檸,同埋李時珍配方既””百花鷄骨草””,
而表演節目就有””事頭婆sell社工乖乖女””,””小龍婆棟篤笑真人show””,””鼻孔噴麵””,””用一隻筷子and一隻匙黎食蠔餅””……..
最後主辦單位更派出紅牌阿婆向壽星公送上”萬千星輝溫情愛心香蕉”一梳,並深深咁祝飛師兄身體健康,身體健康,同埋身體健康既…(阿婆真係講黎講去都剩係講身體健康架,我冇吹水架)

你睇飛師兄笑淫淫咁,幾開心,個咀仲痴住粒蛋糕tim......

你地睇阿靚婆婆個look幾咁有style,剩係o個條領巾呀,都已經將後面o個兩條o靚妹殺過片甲不留啦......


點解會有呢個咁鬼馬既慶祝會呢???概念就係黎自我地擁有多重身份,有”百變星君多面體”之稱既老作界資深從業員,車輪水啦………
佢既創作力可謂係無窮無盡,無論係任何時間(早,午,晚,深宵,飯前,飯後,如廁前,如廁後,攪野前,攪野後,整容前,整容後…)
任何地方(屋企,公司,公園,酒樓,茶記,屎坑,上格床,新娘房,廸士尼,伊拉克,阿塞科彊…)
佢都能夠想出天馬行空,驚世駭俗,國仇家恨,鐵漢柔情,溫馨細膩既絕佳之作
o係呢個tour,佢除左可以tum到飛師兄見牙唔見眼,鬼死咁高興,以後都好難再遇得番d咁別開生面既party之外,o係慶祝會內為我`地創作既造型,亦絕對可以令睇過既人幾晚瞓唔著,當時人更會在心內當下不滅既陰影…呀…..唔係...係倩影…….
這個不能或缺既伙伴,佢就係擁有一個大肚腩既….冷水王

而能夠令我地呢個團空前成功,除左多得各成員既積極冒死出席之外,亦感謝o係幕後安排籌備既幾位攪手,黎度呢度,當然就係到左我地今次既團長,車輪鴨出場啦…….
經過幾次既戶外blog聚,我發覺到揸重型兵器既人係擔演一個十分重要既角色,因為有好多相係我呢d用傻瓜機既永遠都影唔到既,因為佢地既專業,所以佢地所捕捉既角度,位置,時間,係我呢d抱住玩玩下心態既人捉摸不到既領域,所以有左佢地既專業態度同能力,我地先可以玩得咁輕鬆,放心…..

有請今次逍遙遊既靈魂人物,型爆既重裝備攝影師…..迷路鴨子

車輪7子,點能夠少左最後一個,呢條茂利係精神病患者既先軀,魔鬼既化身,飲食業界既害蟲,陶大宇既接班人,一個剩係識講””飲啦””既社工,夜晚唔洗瞓覺既蟑螂
車輪”瘋”呢個名真係當之無愧…
因為呢條友係一個可憐人,唔係返正常時間既工,冇得放紅日,但係佢見到blog友既行山網誌,好想join埋一齊玩,所以佢好早就申請定假期,再懇請blog友們組團,幸好得到blog友們既體諒同支持,令到呢個生活頹廢,時間顛倒,晝伏夜出,未老先衰,體能急劇下降既死剷,能夠重拾番一d健康既生活,體驗下大自然既閒適,

在此對眾blog友致萬二分既感謝…….
呢條麻煩友就係…. 終極黑仔王

因為小弟緩慢既電腦操作,所以呢篇網誌足足用左我整整兩日既時間,亦令我o係呢兩日近乎放棄晒探訪其他blog友,但係呢個旅程,實在令我十分回味,少少犧牲亦覺值得,
難得相識
難得共聚
難得投緣
難得維繫
讓我們繼續向前走下去,一同開展yahoo blog裡的新世界…...