惡夢(上)

新年到而家都冇UPDATE過,今次唔係因為我懶,而係冇心機...

我近排過左一段好差既日子,因為身體出左毛病

喺4月尾,我無啦啦出風癩,其實我以前都出過,通常出幾日就會自己散架啦,但今次有D唔尋常,以前出喺個身度,今次一開始就出喺頸,跟住仲上埋頭

見唔係好對路,我已經即刻去睇醫生,近年多左睇中醫,所以今次都揀左睇中醫

食左幾日藥,好似冇乜用,於是轉去睇西醫

又食左幾日,都係唔散,我又去睇第2個中醫(百昌),今次好似好D喎,散喎...

食左兩日藥,差唔多散晒,我幾鬼高興,剩番兩,三粒喺個頭度,諗住睇多次清清佢啦...

諗住有曙光啦,點知又起番,呀......

即刻走去同大夫講,大夫一臉疑惑:冇可能架喎,應該退架啦喎,得,我開劑重D比你,飲左就實退架啦...

呢劑唔飲尢自可,一飲就恐怖啦,我夜晚飲,第朝起身成個頭腫到豬頭咁,我照鏡連自己都嚇親,腫到完全變左另一個樣,好似整左容咁

好彩返到公司慢慢消腫(當然係消唔晒啦),唔掂啦,形勢危急,第2朝射波去睇胡醫生,佢開左7日藥比我,之後再食一個月抗敏藥(同三年前一樣)

我心諗,胡醫生已經係我最後既希望,再唔得真係唔知點算啦...

我已經問定胡醫生,食左藥係咪就會開始退架啦?佢答我:正常係...

我都好緊張個結果係點.....................................

食左頭兩日,冇退既蹟象,連少左都冇,只係D風癩位置向下移,但一樣多,心裡已經涼左一截,不過冇辨法啦,只能夠繼續食藥,可能食多兩日會好D呢~~~

再食多兩日,都係咁上下,但開始有咳,有低燒

冇計...,收工去睇梁浩照,攪掂D咳先啦...

停左胡醫生既藥,夜晚食左一次梁浩照,第2朝起身發現燒到38度,於是落去搵梁浩照諗住叫佢補番D退燒丸比我,點知佢就捉我入去睇多次,仲重新開左一剷藥比我(足足有9隻藥,包括有兩隻抗生素)

咁我梗係乖乖地食D野就上床休息啦...

呢次出事啦...............

瞓到一點鐘醒左,覺得塊面好緊,起身照一照鏡,D風癩喺塊面出到一撻撻,唉...唔理啦,燒到暈下暈下,繼續瞓啦.........

到3點幾再醒左...望下對手,嘩...今次唔係風癩,係紅疹喎,再周圍望下,嘩........原來唔只對手,係全身都有,起碼8成皮膚都係,超級恐怖.......

我意識到呢次唔會係小問題,我選擇左打比胡醫生問下佢點攪,佢第一時間叫我去睇急症

我已經做好要留院同有排等既心理準備,於是我立即執件衫同一支水就飛的去QE啦..........