新"蒸"頭....

連續幾日冇掂過部電腦,到家陣先叫有小小時間,就咋咋林整番篇先,唔係d人以為我著左草都似...

話說年三十晚與一眾blog友去左筲箕灣上香,o係上香之前就去左老麥啪d野食先,點知一坐低,就病發啦,咩病???咪就係攝影病囉,呢班友仔竟然唔係買野食先,而係成班人即時掹晒d武器出黎狂shot,你影我,我影你,足足互片到走o個一刻,唉~~~你話呢班人係咪傻架.....

呀...有一樣野一定要講既,就係o個晚既氣溫大概得8,9度,仲要間中有雨,所以可以話係凍到死......咁濟,但係我地既""鐘少""大哥竟然只係身穿一件短tee,再加一件好似紙咁薄既風褸,但佢依然企得直一直,連震都唔震下

嘩....................o個種強健既體魄同o個份壯闊既豪情,簡直令小弟深深地拜服,我諗我窮一生既緞練都去唔呢個境界

請容我o係度講一句...

鐘少…..有尿道…..

上完香,就去維園join埋carol佢地去行年宵,嘩.......我頂丫,真係多人到丫......真係迫到你瀨屎咁濟,行行下直頭行到雙腳離地,好似o係人群中飄浮緊咁,唔知仲以為自己識輕功,咁都未係最bad,最bad既就係竟然o係咁既環境仲有d粉腸走黎行逆流,

唉~~~~~~咁後生就失明兼弱智,真係陰公,真係""福街始終有你""

行左一行之後我地就即刻搵地方吔煙,跟住經一致裁定都係放棄行程去食野算啦,o係離開途中比一大班年青人捉住我地幫佢地影團體相,我心諗,你地瀨野啦,幫你地影完,轉頭叫你地幫我地影番,你地就知味道啦,哈~~~我地幾多武器o係身先得架,不過......我地好仁慈,後尾都係攞左幾部黎影je....

跟手去左食華姐牛腩麵,然後就各自散啦

初一同老豆約埋大佬一家,家明兩公婆入左"阿惡"度開餐,全部人都留o係愉景灣住兩日,因為我第日要返工,所以就一個人孤伶伶咁搭番車返屋企,o係等車o個陣,我個心就只有一句說話

愉景灣真係好很凍呀,shit…..